Nieks Dao

De verhaole en geruchte ginge al langer door Valkeberg, neemes wool ut geluive:
"Hubste ut gehuèrd ? De Luèterklöpperkes gaon dr mit sjtoppe ?!?! Meinste dat? Nae toch, klop dat ?!"
Helaas, ut klop. Dees waek, mit de sjtart van ut viefde seizoen, kaom beriech van de Luèterklöpperkes dat op 29 december hunne lètste prins oetgeroope weurd bie Grand Hotel Voncken. En op 5 Fibberwari organizere ze un groate jubileumSITZUNG um hun 11-jaorig jubileum te viere.
Mit ut einde van de Luèterklöpperkes verluus de Valkebergse Karnaval unne sjmaakmaker. . .

Op vriedig 4 fibberwari woord op de Brand broewerie in Wielder al weer de derde versie van ut Beersjtaeke georganiseerd. Op dit beersjtaeke weurd ut beer gekäörd dat mit de carnaval door zoe väöl leefhubbers gedronke weurd. Ut beer weurd normaal gekäörd door dr broewmeister en ut laboratorium van de broewerie mèh mit ut beersjtaeke weurd dit gedaon door dr nuuje prins van de Brand dae op deze daag oetgeroope weurd.
En wae ies noe dit jaor oetgeroope tot prins van de Brand ? . . . . . . Neemès minder es ooze eige Frank Marx !
Same mit zien prinses Sonja haet hae ut beer gekäörd en good bevonge. Veer hoove oes dus gein zurg te make euver oes beerke dees karnaval. Same mit tientalle prinse, prinsesse, ministers, raode van 11, gardes en anger karnavalsgezelsjappe oet de ganse provincie hubbe ze dao in Wielder nog lang en väöl gefiès.
Veer van Nieks Dao wunsje prins Frank I en zien prinses Sonja väöl plezeer en sjpas mit de komende karnaval !
Klik hie veur de foto van prins Frank I en zien prinses Sonja.

Op zoondigmiddig 9 jannewari woord door de Jeugkarnaval weer de proclamatie van dr jeugprins en minister georganiseerd in de Polfer. Zoe wie geweunlik es get in Valkeberg te doon ies, waor dr zaal aan t begin get laeg, mèh nao ongevaer un hauf oer waor ut gezellig vaol en zoot de sjtumming dr good in. Nao un aantal optraejes van onger angere ne dansgroep van Cosy Irene Corner waor ut dan zoewiet: De Proclamatie.
Mèh veur de proclamatie koos beginne moste ièrsj nog prins Joshua I en zien ministers Zoë en Kaj ontgroend waere. Un klusje veur oud prins Thei en oud minister Frans die zelf un waek geleje dr aan moste geluive. Mèh ze hubbe zich ingehouwe. Op un gegaeve moment woorte onger muziek van de pirate oet de karibe twiè sjatkiste door ach oud prinse en ministersj nao binne gedrage en op de bühn gezat. En oet die sjatkiste sjpronge prins Jeroen I en ziene minister Milan. Allebei oet Brookem, net wie de prins en minister van de Mirlitophile. Brookem haet de mach in Valkeberg euver genome !
Veer van Nieks Dao wunsje prins Jeroen I en minister Milan väöl plezeer en sjpas mit ut komende karnavalsseizoen!
Klik hie veur de door Roy Geenen gemaakte foto van prins Jeroen I en ziene minister Milan.

Op zoondigmiddig 2 jannewari waor ut eindelik zoewiet: de Mirlitophile maakte in de Groate Sjtraot hunne jubileumprins bekind. Nao un aantal optraejes van onger andere Sacha en ut Rowena woorte prins Thei en minister Frans ontgroend door de Oud Prinse. Ze woorte veur un middeleeuws tribunaal geplaatsj en in dr sjandpaol gezat, kompleet mit eier en tomate die gaer door de lede van de jeugkarnaval woorte gesjmete. Nao un optraeje van Leon en Hans, die hunne sjlager zonge dae dr publiekspries hauw gewonne op de sjlagerverkeezing in november, waor ut tied veur de proclamatie.
Dr kaome twiè Bokkeriejers de bühn op die verdacht väöl leeke op twiè leede van Nieks Dao . . .
Zouwe veer dan weer un prinselikke hermenie zeen in un jubileumjaor van de Mirlitophile?
Dae druim waor sjnel dr nak umgedreid: ut waor allemaol um tied te rekke veur ut echte prinselik paar die zich mooste umkleije. Want eederein hauw dr nuuje prins en minister al gezeen dae middig. Want dr Leon Crutzen en dr Hans Reijnders gaon dit jubileumjaor de Vasteloavend in Valkeberg veur es prins Leon I en minister Hans.
Veer van Nieks Dao wunsje die twiè raskarnavalliste väöl plezeer en sjpas mit ut komende karnavalsseizoen!
Klik hie veur de door Ivan Poswick gemaakte foto van prins Leon I en ziene minister Hans.

Op donderdigaovend 30 December 2010 waor ut weer zoe wiet: de 10e versie van de prinseproclamatie / zitting van de Luèterklöpperkes woord weer gehaute in ut Grand Café van hotel Voncken op ut Walramplein. Tijdens dees zitting woord dr nuuje prins oetgeroope. Dit kièr weurd dr prins neet door un prinses mèh door unne minister begeleid. Ut ies un famillieaangelegenheid gewoore: Prins Dennis I en ziene broor Marc ies minister.
Veer van Nieks Dao wunsje euch väöl plezeer en sjpas mit ut komende karnavalsseizoen!
Klik hie veur de van TV Valkeberg geklauwde foto van de prins en ziene minister.

Op zaoterdigaovend 13 November woord in de grot de waalbekinde sjlagerverkeezing georganiseerd door de Mirlitophile. Van alle deilnummers waor volges de sjuurie ut Rowena ut bèste en häör leedje Vastelaovend Weurt Noe Biezonder is noe dr jubileumsjlager veur ut komende carnavalsseizoen. Hieônger kinste ut optreeje van Rowena in de grot bekieke.
Kiek ns good nao ut kleinste dansmarieke wat mitdeit. . . Dat is oes Demi van de hermenie!

Op zoondigmiddig 10 Oktober 2010, jao op 10-10-10 want dan kin de Sheriff ut auch onthouwe, zeen ut Ingrid en Roger (alias de Sheriff) getrouwd. Um twiè oer ies op ut gemeintehoes de plechtigheid gewaes wonao veer un klein serenade gebrach hubbe in de hal van ut gemeintehoes. Ut waor unne sjoane zonnige (en auch bès waal werme) daag en de foto's op ut graasveld veur ut gemeintehoes zeen leuk gewore. Vanaaf 3 oer waor de receptie en ut feeske in hotel Monopole wo eederein ziech good geamuseerd haet mit optredens van Erwin en Jack Vinders.
Klik hie veur de groepsfoto op ut graasveld veur ut gemeitehoes.

Laes wiejer

Hieonger kump sjtraks ut auwe nuujts vreuger jaore te sjtaon.